गोरखा ।केटी जिस्काएको निहुँमा बिबाद हुँदा एक युबाको ज्यान गएको छ । लमजुङको राइनस नगरपालिका–४ अल्कटारबाट आएका जन्ती र गोरखा पालुङटार नगरपालिका कुमाल गाउँका माइती पक्षबीच केटी जिस्काएको विषयमा विवाद भएपछि कुटाकुट हुदा अल्कटारका ३४ वर्षीय विष्णुबहादुर कुमालको ज्यान गएको हो । कुटपिटबाट गम्भिर घाइते भएका कुमालको पोखराको गण्डकी मेडिकल कलेजमा उपचारको क्रममा ज्यान गएको जिल्ला प्रहरी कार्यालय गोरखाले जनाएको छ ।
कुमाल पालुङ्टारमा जन्ती आएका थिए ।बुधबार बेहुली लिएर र्फकँदा वेहुली पक्षका करिब १७–१८ जना युवाहरुले जन्तीपक्षलाई गाडी रोकेर आक्रमण गरेका बताइएको छ । घटनामा संलग्न भएको आशंकामा पालुङ्टारका केहि युवालाई प्रहरीले पक्राउ गरी इलाका प्रहरी कार्यालय पालुङ्टारमा राखेको जनाएको छ ।
जिल्ला प्रहरी कार्यालय गोरखाका एसपी भोला रावलका अनुसार थप घटना हुन नदिन अहिले पालुंटारमा थप प्रहरी समेत परिचालन गरिएको छ । घटनाको अनुसन्धान भइरहेको एसपी रावलको भनाई छ ।