महिला कर्मचारीवाट प्रवाह हुने सेवा उत्कृष्ट र अनुशासित हुन्छ:प्रमुख जिल्ला अधिकारी पाण्डे

 पाेखरा ।  कास्कीका प्रमुख जिल्ला अधिकारी भरतमणि पाण्डेले    महिला कर्मचारीवाट प्रवाह हुने सेवा उत्कृष्ट र अनुशासित हुने  बताउनुभएकाे छ । आइतबार  पोखरा महानगरपालिका वडा नम्बर ३ स्थित नदीपुरको अस्थायी प्रहरी पोस्टमा  सबै महिला प्रहरीलाई खटाएर  गरिएकाे  सेवा शुभारम्भ कार्यक्रमकाे समुद्घाटन गर्दे    उहाँले महिलाहरू मात्र कार्यरत रहेको युनिट बढी अनुशासित हुने बताउनुभयाे ।  प्रमुख जिल्ला अधिकारी  पाण्डेले महिला कर्मचारीहरुबाट विभिन्न कार्यालयहरुबाट सेवा दिँदा अनुशासित तथा उत्कृष्ट कार्य भईरहेको जानकारी दिदै  यस अस्थायी प्रहरी पोष्टबाट समेत न्याय, समानता र सुरक्षा सम्बन्धी सेवामा सुधार ल्याउन, समाजमा शान्ति सुरक्षा, लैङ्गिक समानता प्रबर्धन गर्ने कार्यमा राम्रो सेवा प्रवाह हुने धारणा व्यक्त गर्नुभयाे ।    कानुनको पालन गरेर समाजमा शान्ति कायम गराउन नागरिक समाजको पनि दायित्व  रहने उहाकाे भनाइ थियाे ।

जिल्ला प्रहरी कार्यालय कास्कीका प्रहरी प्रमुख, प्रहरी उपरीक्षक श्यामबाबु ओलियाले महिलाहरू मात्र कार्यरत भएको युनिटले शान्ति, सुरक्षा, अमनचयन कायम गराउन अन्य युनिट भन्दा उत्कृष्ट कार्य गर्ने विश्वास ब्यक्त गर्नुभयाे ।

जिल्ला प्रहरी कार्यालय कास्की अन्तर्गत ७७ वटा युनिट रहेकोमा नदीपुरको पोस्टमा महिला प्रहरीलाई मात्र खटाइएको हो । प्रहरी सहायक निरीक्षक दीपा आलेको नेतृत्वमा   प्रहरी हबलदार सङ्गीता महतो, जवान देवी पुर्जा, मनीषा बुढा, अमृता अठारे, गङ्गा सुनार, जानुका श्रेष्ठ, मञ्जु नेपाली र ममता सिंह खटिनुभएको छ ।

कार्यक्रममा जिल्ला प्रहरी कार्यालय कास्कीका प्रहरी निरीक्षक सरला ढकाल, पोखरा महानगरपालिका वडा नं. ३ का निवर्तमान अध्यक्ष रविन्द्र बहादुर प्रजू, पत्रकार महासंघ गण्डकी प्रदेशकी महासचिव जमुना शर्मा, पोखरा महानगरपालिका वडा नं. ३ का अध्यक्ष प्रकाश मान उदास लगायतले बोल्नु भएको थियो । सोही अवसरमा जिल्ला कास्की पोखरा म.न.पा. ३ बस्ने धर्मराज बरालले अस्थायी प्रहरी पोष्ट नदिपुरलाई १ थान स्कुटर समेत हस्तान्तरण गर्नुभएको थियो ।