कास्की । जिल्ला प्रशासन कार्यालय कास्कीको आयोजनामा आइतबार पाेखरामा लागुऔषध तथा मदिरा नियन्त्रण सम्बन्धी प्रदेश स्तरीय कार्यशाला गोष्ठी सम्पन्न भएको छ । गोष्ठीको उदघाटन गर्नुहुँदै गण्डकी प्रदेशका मुख्यमन्त्री सुरेन्द्रराज पाण्डेले लागु औषधको प्रयोगले समाजमा अपराध, स्वास्थ्य समस्या, बेरोजगारी, पारिवारिक बिखन्डन बढ्दै गएकाे बताउनुभयाे । लागुऔषध तथा मदिरा सेवनकाे बिषय व्यक्ति, घर परिवार, समाज र सिङ्गो राष्ट्रको भविष्यसँग जोडिएको बताउँदै उहाँले यसकाे नियन्त्रणका लागि सबै पक्ष जिम्मेवार हुनुपर्ने बताउनुभयाे । पर्यटकीय राजधानी पोखरामा आउने पर्यटकलाई पाेखरा लागुऔषध दुर्व्यसन मुक्त क्षेत्र हो भन्ने पहिचान कायम गराउन सबै सराेकारवाला गम्भीरतापुवर्क लाग्नुपर्नेमा उहाँले जाेड दिनुभयाे ।
गण्डकी प्रदेशमा घरेलु मदिराको उत्पादनलाई नियमन तथा ब्यवस्थापन गर्न बनेको विधेयक प्रदेश सभामा दर्ता भएको र अहिले अर्थ तथा बिकास समितिमा छलफलको क्रममा रहेको जानकारी दिदै मुख्यमन्त्री पाण्डेले विधेयकले घरेलु मदिरा उत्पादन र बिक्री बितरणलाई ब्यवस्थित गर्ने, रोजगारीको सिर्जना गर्ने, बिभिन्न समुदायको धर्म संस्कृती र परम्पराको जर्गेनामा पनि मद्धत पु¥याउने बतनउनुभयो ।
कार्यक्रममा बोल्दै पोखरा महानगरपालिका प्रमुख धनराज आचार्यले लागुऔषध, मदिरा लगायतका दुर्व्यसनी नियन्त्रणमा पहिलो दायित्व परिवार रहेको बताउँदै यसबाहेक शिक्षक, अविभावकले बालबालिकालाई लागुऔषधको असर बारे सचेत गराउन सकिने बताउनुभयो।
कास्कीका प्रमुख जिल्ला अधिकारी भरतमणि पाण्डेले लागुऔषध तथा मदिरा नियन्त्रणका सन्दर्भमा जिल्ला प्रशासन कार्यलय कास्की गम्भीर भएर काम गरिरहेकाे जानकारी दिदै सबैको साझा प्रयासले मात्र लागुऔषध,मदिराकाे प्रयोगलगायत अन्य बिकृती तथा आपराधिक गतिविधिलाई निरुत्साहित गर्न सकिने बताउनुभयो।
गण्डकी प्रदेशका एघार जिल्लाका प्रतिनिधि रहेको सो कार्यक्रममा गण्डकी प्रदेश प्रहरी कार्यालय पोखराका प्रहरी उपरीक्षक रमेश पण्डितले कार्यपत्र प्रस्तुत गर्नुहुँदै गत वर्षको तुलनामा यस आर्थिक बर्षमा लागुऔषधका मुद्दा तथा आपराधिक घटनामा कमी आएको तथ्याङ्क प्रस्तुत गर्नुभएकाे थियाे।
कास्कीका सहायक प्रमुख जिल्ला अधिकारी शिव लम्सालले कास्कीमा लागुऔषध, मदिरा लगायतका दुर्व्यसनी नियन्त्रणका लागि विभिन्न सचेतनामुलक कार्यक्रमहरु सञ्चालन गरिएको जानकारी दिनुभयो ।
कार्यक्रममा गण्डकी प्रदेशका ११ जिल्लाका जिल्ला प्रशासन कार्यलय तथा जिल्ला प्रहरी कार्यलयका प्रतिनिधिले जिल्लामा लागुऔषध, मदिरा लगायतका दुर्व्यसनीकाे अबस्था र चुनाैतिका विषयमा जानकारी गराउनुभएकाे थियाे।
कास्कीका प्रमुख जिल्ला अधिकारी भरतमणि पाण्डेकाे अध्यक्षतामा सम्पन्न कार्यक्रमकाे सञ्चालन प्रशासकिय अधिकृत रामप्रसाद सुवेदीले गर्नुभएकाे थियाे ।
