कुञ्ज थापा
म पुस्तक बिमोचन गर्न चाहन्छु
एउटा कबिको हातबाट
तर त्यस समारोहमा मेरा मुख्य अतिथि
दौरा सुरुवालमा होईन
कोरा कमेज र ढाका
टोपिमा होईन,
खुकुरी र तरबार भिरेर
गोरखाली ह्याट सिउरेर
केबल फौजी लिवासमा
मेरा दुई पुस्तक बिमोचन गरि दिनु हुने छ
जसमा एउटामा जनबादको कथा छ
अर्कोमा धनबादको गाथा छ।
अश्मिता र राष्ट्रीयता
राष्ट्र भित्रै हराएको ब्यथा छ
घुँयत्रो धनुष र साहसले
रक्षा गरेको चार किल्ला
उखेलिएको कथा छ
साँझ बिहान साँधमा
धाबा बोलिएको पिडा छ।
भरुवा बन्दुक भिरेर ब्याधा
गाउँ शहर घुमि रहेको अबस्था छ
रातभर मृगबास र गुँड खोजि रहेछ
साँझ बास बस्न नपाउँदै
छर्रा र एल जि खानु परेको छ।
सिकारी मृग साबका
टुक्रा टुक्रा पारी बिच बजारमा
भाउ लगाउँदै छ
कालिज र मुनाल छोप्ने
दाउ लगाउँदै छ।
आचार संहिता र भ्रष्टाचार
बागमतीसंगै पखालिएको छ
पापसंगै मिसिएर बिष्णुमती
आफै दुषित भै रहेछ ।
यस्तो संगिन बिषय बस्तु
समेटिएको मेरो किताबको रीबन
तपाँईको रंगिन तरबारले
काट्नु पर्ने छ।
फेरि यो देशमा राष्ट्रीयता
राष्ट्र गौरब र साँस्कृतिक
एकताको बिगुल फुक्नु पर्ने छ
भ्रष्ट आचार निर्मुल पारेर
बागमतीमा निर्मल जल
अबिरल बगाउनु पर्ने छ।
जनबाद र धनबादलाई
एउटै रथका दुई पाँग्रा बनाएर
युद्द मैदानमा कुदाउनु पर्ने छ
संघर्षमा घर्सि घर्षि आहत
बनेका योद्दाहरुलाई
मलहम लगाई पुनर्जिवन
दिनु पर्ने छ।
कबितामा कोरिएको राष्ट्र भावलाई
मुर्त रुपमा बदली
फेरि उचाल्नु पर्ने छ देशलाई
तीन बित्ता उचाली।