पोखराको पृथ्वीचोकस्थित होटल नीलकमलका सञ्चालक शालिग्राम पौडेल अपहरणमा संलग्न ३ भारतीय नागरिकलाई पुर्पक्षका लागि थुनामा पठाउने आदेश भएको छ । कास्की जिल्ला अदालतले उनीहरुलाई सो आदेश दिएको हो । न्यायाधीश दीपेन्द्र अधिकारीको इजलासले उक्त आदेश गरेको हो । विहार बनारपुरका ३९ वर्षीय सुनीलकुमार तिवारी, सोही ठाउँका सुन्दरम तिवारी र अविजित राय बिहीबारै कास्की कारागार पठाइएका छन् । उक्त दिन अदालतमा भएको थुनछेक बहसपछि न्यायाधीश अधिकारीले पुर्पक्षका लागि थुन्ने आदेश दिएका हुन् । उनीहरु माथि बुधबार जिल्ला सरकारी वकिलको कार्यालय कास्कीले अपहरण र शरीर बन्धक एवं डाकाचोरीसम्बन्धीको मुद्दा दर्ता भएको थियो ।थप अनुसन्धानका लागि उनीहरुलाई थुनाको आदेश भएको बताइएको छ ।
यस्तो छ घटनाक्रम :
भारतको विहारबाट पोखरा आएका सुनील, सुन्दरम र अविजित वैशाखको १७ गते पोखराको पृथ्वीचोक स्थित होटल नीलकमलमा बसेका थिए । उनीहरुले होटलमा खाना खाए ।खाना खाएको पैसा तिर्नको लागि पैसा नभएको कारण देखाउँदै एटिएमबाट पैसा निकालेर दिन्छु भन्दै भोलिपल्ट पौडेललाई कारमा लगेका थिए ।
सर्बप्रथम उनीहरुले होटल संचालक पौडेललाई पोखराको सिर्जनाचोक लगे । उनीहरु राष्ट्रबैंक चोक हुँदै ड्यामसाइड पुगेर होटल केसीमा चिया समेत खाएको प्रहरी अनुसन्धानमा खुलेको छ । उनीहरुले पौडेलसँग भएको मोबाइल खोसेको र मुख बाँधेर पिट्दै स्याङ्जातिर लगेको प्रहरीले बताएको छ ।
पिटाइको पिडाले कारभित्र नै छटपटाएका पौडेल कारको ढोका खोलेर सडकमा बजारिएका थिए । बाटोमा हिँड्दै गरेको ट्याक्सी चालकले घटना थाहा पाएर प्रहरीलाई खबर गरे । स्थानीय युवाले उक्त गाडीको पिछा गरे । अन्त्यमा स्याङ्जाको फेदीखोला पुगेपछि फेदीखोलामा स्याङ्जा प्रहरीको समन्वयमा कार र अपहरणकारीलाई पक्राउ गरिएको थियो ।