पोखरा । संगम बचत तथा ऋण सहकारी संस्था पोखरा १५ ले साधारणसभा सम्पन्न गरेको छ ।
साधारणसभाको उद्घाटन गर्दै पोखरा १५ का वडा अध्यक्ष एवम् संस्थाका शेयर सदस्य तोरण बहादुर बानियाँले वडा १५ कै पहिलो र ठुलो सहकारी संस्थाले गरेको प्रगतिले आफुलाई खुसी लागेको बताए ।
संगम बचत तथा ऋण सहकारी संस्थाका अध्यक्ष नबराज तिवारीले सबैको साथ सहयोगले गर्दा नै आज संगम गण्डकी प्रदेशकै उत्कृष्ट सहकारी बन्न सफल भएको भन्दै सबैलाई धन्यवाद व्यक्त गरे ।
लेखा सुपरिवेक्षण समिति संयोजक भोबिन्द्र गिरीले ऋण सुरक्षण कोषमा शतप्रतिशत रकमको ब्यवस्थापनले संस्थालाई मजबुत बनाउने भएकोले सबैले ढुक्कसँग कारोबार गर्न अनुरोध गरे ।
कार्यालय प्रमुख बृहस्पति अधिकारीको संस्थागत प्रस्तुति रहेको सभामा कानुनी सल्लाहकार दयाराम गौतम , उपाध्यक्ष बुद्धिमान थापा , सचिव धनराज पुरी , अक्षयकोषदाता सन्ध्या कुँवर , विद्यार्थी तुमिन थापा , शेयर सदस्यहरु ई. आनन्द सापकोटा , टकदेवी पुन लगायतले मन्तव्य राखेका थिए ।
सभालाई उद्घाटन र बन्द सत्र गरि दुई भागमा नगरिकन एकैपटकको बसाइमा विभिन्न विषय उपर छलफल समेत गरि सम्पन्न गरिएको हो ।
सभामा सचिव धनराज पुरीले पेस गरेको प्रगति प्रतिवेदन सहित भरत बहादुर थापाले पेस गरेको कोषाध्यक्षको प्रतिवेदन र भोविन्द्र गिरीले पेस गरेको लेखा सुपरिवेक्षण समितिको प्रतिवेदन पारित गरेको छ ।
यसैगरी २०८०/८१ को लेखा परिक्षकको प्रतिवेदन पनि पास भएको छ ।
सभाले गत आर्थिक वर्षको लाभांश तथा संरक्षित पुँजी फिर्ता कोषको रकम बितरण सम्बन्धी प्रस्ताव पनि पेस गरिएकोमा पारित भएको छ ।
सभामा संगम योग केसी स्मृति पुरस्कार र संगम सिद्धान्त कुँवर स्मृति छात्रवृत्ति पनि बितरण गरियो ।
सेयर सदस्यका परिवार मध्ये बाट कक्षा १२ मा उत्कृष्ट हुने दुई जनालाई दिइने संगम योग केसी स्मृति पुरस्कार बाट तुमिन थापा र कृतिका पुरीले नगद सहित सम्मान पत्र प्राप्त गरे ।
उनीहरुलाई अक्षयकोषदाता लक्ष्मी केसी र उनका परिवारले पुरस्कार प्रदान गरेका हुन् । यसैगरी सिद्ध माध्यमिक बिद्यालय पोखरा १५ मा कक्षा ९ र ११ मा अध्ययनरत विद्यार्थीहरु क्रमशः आयुस्मा पुन र एलिना श्रेष्ठले यस वर्षको संगम सिद्धान्त कुँवर स्मृति छात्रवृत्ति पाउन सफल भए ।
उनिहरुलाई पनि अक्षयकोषदाता सन्ध्या कुँवरले नगद र सम्मान पत्र सहित छात्रवृत्ति प्रदान गरिन् । सात करोड ५० लाख शेयर पुँजी , ४५ करोड ५२ लाख बचत , ४६ करोड ५८ लाख ऋण लगानी रहेको संस्थाको ६२ करोड ९२ लाख वासलात रहेको छ । यसैगरी जगेडा तथा अन्य कोषमा छ करोड ६७ लाख रहेको संस्थामा १२ करोड ७६ लाख तरलता रहेको छ ।
कास्की जिल्ला कार्यक्षेत्र भएको संस्थामा २९३३ जना शेयर सदस्य रहेका छन् । यसैगरी संस्थाले ऋण सुरक्षण कोषमा आवश्यक पर्ने शतप्रतिशत रकम रु. १,७६,४४,२३२/४५ ब्यवस्था गरेको छ ।
