माउन्ट अन्नपूर्ण मा.विमा नवआगन्तुक विद्यार्थीलाई स्वागत तथा अभिमुखिकरण कार्यक्रम सम्पन्न

पोखरा । शैक्षिक क्षेत्रमा लामो इतिहास बनाएको अन्नपूर्ण मा.वि. नदीपुर पोखराले कक्षा ११ मा होटल म्यानेजमेन्ट र म्यानेजमेन्ट सङ्कायका नवआगन्तुक विद्यार्थीलाई एक समारोहका बिच अभिमुखिकरण तथा स्वागत कार्यक्रम सम्पन्न गरेको छ। नेपाल राष्ट्र बैंक पोखराका निर्देशक श्री बीना ढकालको प्रमुख आतिथ्यता रहेको उक्त कार्यक्रम विद्यालय सञ्चालन समितिका अध्यक्ष श्री सुरजप्रकाश प्रधानाङ्गको सभापतित्वमा सम्मान भएको थियो।

कार्यक्रममा विशेष अतिथिका रूपमा उपस्थित उत्पेरक वक्ता.रविन कटवालले नवआगन्तुक भाइबहिनीलाई जे शिक्षाको महत्वबारेमा स्पष्ट पार्दै जीवनमा धैर्य,लगन साधानाले लक्ष्य प्राप्तीका महान् सुत्र भएको बताउदै विद्यालयले स्वदेशमै केही गरौ भन्ने भावना जागरुक गराउन सफल बनोस भन्ने शुभकामना व्यक्त गर्नुभयो।

विद्यालयका एकेडेमी डाइरेक्टर अशोक कुमार शाही, सञ्चालक समितिका निवर्तमान अध्यक्ष चिजकाजी गुरुङ, अतिरिक्त क्रियाकलाप संयोजक तेज गुरुङ,प्रशासक चित्र गुरुङ तथा संस्थापक झम गुरुङले विद्यार्थीलाई अबिर र खादाले स्वागत गर्नुभयो।

विद्यालयका प्राचार्य सइन्द्रराज श्रेष्ठले कार्यक्रममा सहभागी सबैलाई धन्यवाद ज्ञापन गर्दै, समयसापेक्ष शिक्षालाई परिमार्जित गर्न माउन्ट अन्नपूर्ण हरदम प्रयासरत रहने बिचार व्यक्त गर्नुभयो।

कक्षा १२मा अध्ययनरत विद्यार्थीहरुद्वारा आयोजित उक्त कार्यक्रममा छात्रा क्यारोन गुरुङले आफ्ना अनुभव साट्दै आफूलाई माउन्ट अन्नपूर्णले पढाइका साथै अन्य सिपमा पनि पोख्त बनाएको बिचार व्यक्त गरिन। कार्यक्रम कक्षा१२मा अध्ययनरत् सरिस राना र सिजन नेपालीले सञ्चालन गरेका थिए।

पोखरा आरम्भ चौतारीद्धारा परोपकार महासंघलाई सहयोग

पोखरा ।   लायन्स क्लव अफ पोखरा आरम्भ चौतारीले राष्ट्रिय  परोपकार महासघंद्वारा पोखरा–१५ मा संचालित बटुक आश्रममा दैनिक उपभोग्य सामाग्रिहरू सहयोग गरेको छ ।

शनिबार एक कार्यक्रमको आयोजना गरेर चामल, दाल, आलु, तेल, घ्यू, नुन,मसला, विस्कुट, चिउरा, तरकारी, गेडागुडी लगायतको करिव ५० हजार रुपैयाँ बराबरको सामाग्रिहरू सहयोग  गरेको हो ।
आध्यात्मिक ज्ञानको माध्यमवाट समाजमा सकारात्मक सन्देश प्रवाह गर्दै धर्म संस्कृतिको जगेर्ना  गर्ने सवालमा  सधै प्रतिबद्ध रहने लायन्स क्लव अफ पोखरा आरम्भ चौतारीकी अध्यक्ष कृष्ण कुमारी कुवँरले बताउनुभयाे ।
लायन्स  क्लव अफ पोखरा आरम्भ चौतारीकी अध्यक्ष कृष्ण कुमारी कुवँरको अध्यक्षतामा भएको कार्यक्रममा रिजन चेयर पर्सन मोहन राज आचार्य, भागवत भाष्कर युवा पण्डित कमलनयन गौतम, जोन चेयर पर्सन महेश्वर रिमाल, चित्र बहादुर गुरूङ, माया बराल लगायत सहभागी बनेका थिए । कार्यक्रमको सहजिकरण लायन्स क्लव अफ पोखरा आरम्भ चौतारीका सचिव देविका कार्किले गरेकी थिइन् ।
असाहयहरूलाई शिक्षा प्रदान गर्दै आएको आश्रममा ६५ जना बटुकहरू अध्ययनरत रहेका छन् ।

ढकालको कविता सङ्ग्रह ‘हिउँका गुच्छाहरू’ सार्वजनिक

पोखरा । कवि शिबु ढकालको कविता सङ्ग्रह ‘हिउँका गुच्छाहरू’ शनिवार पोखरामा लोकार्पण गरिएको छ ।
गीतकार प्रतिष्ठान, नेपालद्वारा आयोजित कार्यक्रममा नेपाल सङ्गीत तथा नाट्य प्रज्ञा प्रतिष्ठानका पूर्व कुलपति सरुभक्तले कृतिको लोकार्पण गरे । सरुभक्तले शिबु ढकालका कविताले दर्शन बोकेका धारणा राखे । उनले कविले आफू जस्तो परिवेशमा हुर्कियो त्यस्तै भाव कवितामा प्रस्तुत गर्ने धारणा राखे । समालोचकहरूले आफ्ना दृष्टिकोण जसरी राखे पनि लेखनमा निरन्तर लाग्नुपर्नेमा उनको जोड थियो ।
कृतिको समीक्षा गर्दै डा. बाबुराम अधिकारीले शिबुका कवितामा नेपाली समाजको सग्लो चित्र उतारिएको विचार राखे । उनले कवितामा आएका चिन्तन परिपक्व रहेको भन्दै ढकालको लेखनले केही मात्रामा बौद्धिक पाठकको अपेक्षा गर्ने टिप्पणी गरे ।
कवि शिबु ढकालले आफूले जीवनमा देखेभोगेका कुरालाई कवितामा उतारेको धारणा राखे । ढकालको यसअघि ‘क्वेस्ट फर भर्जिनिटी’ नामक अङ्ग्रेजी उपन्यास प्रकाशित छ ।
गीतकार प्रतिष्ठानका उपाध्यक्ष अनुराग अधिकारीको अध्यक्षता तथा सचिव रुपिन्द्र प्रभावीको सञ्चालनमा भएको कार्यक्रममा मिलन तिमिल्सिनाले स्रष्टा परिचय र शिवलाल उपाध्यायले शुभकामना मन्तव्य दिएका थिए ।
जम्मा ६१ ओटा कविता सङ्गृहीत कृतिको प्रकाशन पेज टर्नर प्रा. लि. ले गरेका हो ।

एसओएस गण्डकीमा नवआगन्तुक विद्यार्थीको स्वागत तथा अभिमुखीकरण

पोखरा ।      पोखराको रामबजारस्थित एसओएस हर्मन माइनर स्कुल गण्डकीमा कक्षा ११ का नवआगन्तुक विद्यार्थीहरूको स्वागत तथा अभिमुखीकरण कार्यक्रम सम्पन्न भएको छ ।

विद्यालयको प्राङ्गणमा आयोजित एक विशेष समारोहका बीचमा उनीहरूको स्वागतसहितको अभिमुखीकरण गरिएको हो । दीपप्रज्ज्वलनसहित एसओएसका संस्थापक हर्मन माइनरको तस्बिरमा पुष्पार्पण गरी कार्यक्रमको समुद्घाटन गरियो ।
पोखरा महानगरपालिकाका प्रमुख धनराज आचार्यको प्रमुख आतिथ्यमा सम्पन्न उक्त कार्यक्रममा कक्षा १२ मा अध्ययनरत छात्र रविन अधिकारी र छात्रा निहारिका लम्सालले नवआगन्तुक विद्यार्थीहरूलाई शब्दगुच्छाद्वारा स्वागत गरे ।

वरिष्ठ गायक रामभक्त जोजिजूको निर्देशनमा एसओएसका विद्यार्थीहरूले वाद्यवादनसहित राष्ट्रिय गान प्रस्तुत गरे । दीपेङ्का बिजुच्छेले नेवारी समुदायमा प्रचलित शास्त्रीय शैलीको ‘कुमारी नृत्य’ प्रस्तुत गरी समारोहमा आकर्षण थपिन् । त्यस्तै गायक जोजिजूले ‘उडेर जून छुन्छु भन्थेँ’ बोलको आफ्नो चर्चित गीत प्रस्तुत गरेर समारोहमा साङ्गीतिक रौनकता थपिदिए ।

विद्यालयका १०+२ संयोजक खगेन्द्रराज बरालले मन्तव्यसहित कक्षा ११ का नवआगन्तुक विद्यार्थीहरूलाई स्वागत गरे । नवआगन्तुक विद्यार्थीहरूलाई अभिमुखीकरण दिँदै संयोजक बरालले आफ्नो भविष्यका सपना साकार पार्ने उद्देश्य लिएर एसओएस गण्डकीमा प्रवेश गरेका विद्यार्थीहरूलाई योजना साकार पार्ने अभियानमा समर्पित भएर अगाडि बढ्न सुझाव दिए । नवआगन्तुक विद्यार्थीहरूलाई प्रमुख अतिथि धनराज आचार्य, एसओएस गण्डकीका परियोजना निर्देशक प्रदीपभक्त आचार्य तथा विद्यालयका प्रधानाध्यापक चूडामणि सुवेदीले अबिर र खादा लगाएर स्वागत गरेका थिए । विशेष अतिथिको आसनबाट बोल्दै एसओएस बालग्राम गण्डकीका परियोजना निर्देशक प्रदीपभक्त आचार्यले एसओएस गण्डकीमा कक्षा ११ का नवआगन्तुक विद्यार्थीहरूको अबको दुई वर्षे शैक्षिक यात्रा उपलब्धिपूर्ण बनोस् भनी कामना गर्दै उनीहरूको उज्ज्वल भविष्यको कामना गरे ।
समारोहमा नवआगन्तुक विद्यार्थीहरूका तर्फबाट स्वागत स्वीकार मन्तव्य राख्दै कक्षा ११ का सचेत सुवेदीले अध्ययन–अध्यापनका क्षेत्रमा एसओएस पोखराकै सर्वाेत्कृष्ट शैक्षिक गन्तव्य रहेकामा आफू विश्वस्त रहेको बताए । उनी एसओएस गण्डकीबाटै ४ जिपिए हासिल गर्ने विद्यार्थीसमेत हुन् । त्यस्तै छात्राहरूका तर्फबाट स्मृति लम्सालले स्वागत स्वीकार मन्तव्य राख्दै एसइई दिएर बसेपछि तीन महिनासम्म उच्च शिक्षाका बारेमा जिज्ञासा राख्दा सबैले एसओएस गण्डकीको नाम सिफारिस गरेको र आफ्ना सपनाहरू सुनिश्चित गर्ने शिक्षणसंस्थाका रूपमा आफूले एसओएस गण्डकीलाई नै छनोट गरेर बताइन् । उनी पोखराकै डिजिल्यान्ड एकेडेमीबाट ४ जिपिए हासिल गर्ने विद्यार्थी हुन् ।
कार्यक्रममा प्रमुख अतिथिको आसनबाट बोल्दै पोखरा महानगरपालिकाका प्रमुख धनराज आचार्यले अनाथ र असहाय बालबालिकाहरूलाई संरक्षण र शिक्षादीक्षा प्रदान गर्दै एसओएस गण्डकीले शैक्षिक क्षेत्रमा पु¥याइरहेको योगदानको सराहना गरे । ‘एसओएस गण्डकीले प्राप्त गर्दै आइरहेको सफलतामा संस्थाले कहिल्यै पछाडि फर्केर हेर्न परेको छैन । पोखरामा चार सयभन्दा बढी विद्यालयहरू छन् । म सबै विद्यालयमा पुगेर सम्भव छैन । व्यवसायलाई भन्दा सामाजिक सेवालाई प्राथमिकता दिने एसओएसजस्ता प्रतिष्ठित शिक्षण संस्थामा समय भ्याएसम्म आफू पुगेर मैले साङ्केतिक रूपमा सम्पूर्ण विद्यार्थीहरूलाई महानगरको अभिभावकका हैसियतले शुभेच्छा प्रकट गर्दै आइरहेको छु ।’ समारोहमा विद्यार्थीहरूद्वारा प्रस्तुत प्रतिभाको समेत प्रशंसा गर्दै मेयर आचार्यले भने, ‘एसओएसबाट दीक्षित भएर उच्च शिक्षातर्फ अग्रसर हुने विद्यार्थीहरूले शैक्षिक प्राप्ताङ्कभन्दा पनि जीवनपोपयोगी सीप आर्जनलाई प्राथमिकता दिनुपर्दछ । विद्यार्थी भाइबहिनीहरूले विदेशी विश्वविद्यालयका डिग्रीभन्दा आफ्नै विश्वविद्यालयको डिग्री हासिल गरेर मातृभूमिका सेवामा आफूलाई समर्पित गर्नुहोला ।’
कार्यक्रममा एसओएस गण्डकीबाट विद्यालयीय शिक्षा पूरा गरेका पूर्वविद्यार्थीद्वय डा. कृष्णराज अधिकारी र डा. दीपक गौतमको पनि सहभागिता रहेको थियो । काठमाडौँको वीर अस्पतालबाट आन्तरिक औषधी विज्ञानमा एमडी गरेका अधिकारी हाल पोखरा स्वास्थ्य विज्ञान प्रतिष्ठानमा कार्यरत छन् भने चीनको बेइजिङ फरेस्ट्री विश्वविद्यालयबाट वनविज्ञानमा विद्यावारिधि प्राप्त गरेका गौतम हाल पोखराको वनविज्ञान अध्ययन संस्थानमा प्राध्यापन पेसामा सक्रिय छन् ।
पूर्वविद्यार्थीका तर्फबाट अनुभवात्मक मन्तव्य व्यक्त गर्दै डा. कृष्णराज अधिकारीले एसओएस गण्डकीमा अध्ययनरत आफ्नो ब्याचका २६ जना विद्यार्थीहरूमध्ये आज २१ जना विद्यार्थीहरू डाक्टर बनेर बिरामीहरूको सेवामा जुटिरहेका छन् भन्ने खबर सुनाउन पाउँदा मात्रै पनि आफूलाई निकै गौरवबोध हुने बताए । सभाध्यक्षको आसनबाट बोल्दै विद्यालयका प्रधानाध्यापक चूडामणि सुवेदीले एसओएस गण्डकीलाई विश्वास गरेर कक्षा ११ मा भर्ना हुन आउने गण्डकी प्रदेशका उत्कृष्ट मस्तिष्कहरूलाई विद्यालयमा स्वागत गर्न पाउँदा आफू निकै हर्षित भएको बताउँदै विद्यार्थीहरूले एसओएस गण्डकीमा प्राप्त भौतिक र मानवीय सुविधाको उच्चतम उपयोग गर्नेमा आफू विश्वस्त रहेको बताए ।
समारोहमा पोखरा महानगरपालिका वडा नं. १५ का अध्यक्ष तोरणबहादुर बानियाँ, पोखरा महानगरपालिकाकी कार्यपालिका सदस्य मन्दिरा परियार, एसओएस युवालय गण्डकीका प्रमुख बाबुराम बराल, शिक्षक तथा कर्मचारी कल्याणकारी युनियन एसओएस गण्डकीका एकाइ अध्यक्ष मिलन खत्री, एसओएस गण्डकीका सहप्राचार्यद्वय वीरसिंह बूढा र प्रभास पौडेल, एसओएस बालग्राम गण्डकीकी आमा प्रतिनिधि पार्वती पाण्डेलगायतका अन्य विशिष्ट व्यक्तित्वहरूको समेत सहभागिता रहेको थियो ।
कक्षा १२ मा अध्ययनरत छात्रा अपी कुँवर र प्राश्ना पौडेलद्वारा सञ्चालित उक्त कार्यक्रममा नवआगन्तुक विद्यार्थीहरूको स्वागतमा विभिन्न सांस्कृतिक प्रदर्शनीसमेत प्रस्तुत गरिएको थियो । विज्ञान सङ्कायअन्तर्गत जीवविज्ञान र कम्प्युटर समूहको अध्ययन–अध्यापन हुने एसओएस गण्डकीको कक्षा ११ मा हाल भुक्तानी र छात्रवृत्ति कोटामा गरी १ सय ४० भन्दा बढी विद्यार्थीहरू अध्ययनरत छन् ।

कक्षा १२ का विद्यार्थीहरूको आयोजनामा सम्पन्न कार्यक्रमको सभापतित्व विद्यालयका प्राचार्य चूडामणि सुवेदीले गरेका थिए ।