पोखरामा सफल एक्सपो पोखरा तथा तेस्रो मोवाइल मेला २०७५ सुरु

पोखरा,  पोखरा उद्योग वाणिज्य संघको आयोजनामा   पोखरामा  सफल एक्सपो पोखरा तथा तेस्रो मोवाइल मेला २०७५ सुरु भएको छ । एक्सपोको  गण्डकी प्रदेशका मूख्यमन्त्री पृथ्वीसुब्बा गुरुङले उद्घाटन गरे । प्रदेशलाई सम्वृद्ध बनाउने अभियानमा  निजी क्षेत्रले साथ दिनु पर्ने मुख्य मन्त्री गुरुङको भनाई थियो ।
,‘प्रदेश सरकार उद्योग स्थापना र संचालनको लागि वातावरण बनाउन तयार रहेको उल्लेख गर्दे ’ उनले   उद्योग व्यवसायको लागि सुरक्षाको प्रत्याभूति दिन, एकद्धार प्रणालीमार्फत उद्योग दर्ता गर्ने वातावरण बनाउन साथै नाफाको ग्यारेण्टी गर्न  प्रदेशसरकार तयार रहेको बताए ।
कार्यक्रममा बोल्दै नेपाल उद्योग वाणिज्य महासंघ तथा पोखरा उद्योग वाणिज्य संघका पूर्व अध्यक्ष आनन्दराज मुल्मीले सुशासनको कमी तथा तीन तहका सरकारबीच सामजश्यको अभावमा लगानीकर्ताहरु उत्साहित हुन नसकेको बताउनुभयो । राजनीतिक नेतृत्व नै भ्रष्टाचारमा लिप्न हुने तथा घुस नखुवाई कामै नहुने परिपाटी अन्त्य नहुँदासम्म देशका आन्तरिक र बाह्य लगानी आकर्षित हुन नसक्ने उहाँको ठोकुवा थियो ।
उहाँले संघीय सरकारले प्रदेशबाट प्राप्त हुने राजश्वको आधारमा प्रदेशलाई बजेट हस्तान्तरण गर्ने भएकोले राजश्वको स्रोत बढाउन प्रदेश सरकारलाई सुझाव पनि दिनुभयो ।
तनहुँ उद्योग वाणिज्य संघका अध्यक्ष मानकाजी श्रेष्ठले २०३६ सालदेखि बन्द रहेको तनहुँको पालुङटार विमानस्थल संचालनमा आउन सके गण्डकी प्रदेशमा आउने पर्यटकको संख्यामा वृद्धि हुने बताउनुभयो । एक्सपोको मूख्य प्रायोजक लक्ष्मी समूहका कार्यकारी निर्देशक सुनिल श्रेष्ठले उत्पादक र उपभोक्तालाई एउटै थलोमा ल्याउने एक्सपोले आर्थिक गतिविधी चलायमान हुने बताउनुभयो । नेपाल पत्रकार महासंघ कास्कीका अध्यक्ष दीपेन्द्र श्रेष्ठले मेला र महोत्सव आयोजनाको सुरुवात गर्ने पोखरा उद्योग वाणिज्य संघको आयोजनामा हुने मेलाको स्तर खस्कन नदिनेबारे सोच्न आयोजकलाई आग्रह गरे ।
समुद्घाटन सत्रको अगाडि संघको सचिवालयदेखि प्रदर्शनी स्थलसम्म प्रभातफेरीको पनि आयोजना गरिएको थियो । प्रभातफेरीमा उद्योगी÷व्यवसायीहरु सहित ५८ वटा आमा समूहको सहभागिता रहेको थियो ।  सहभागी आमा समुहमध्ये च्यूलीपार्चे तमु समाज, माटेपानी पहिलो, तेर्सापट्टी जल विनायक आमा समूह दोस्रो र दुर्गा भगवती  महिला समूह, श्रीधाराले तेस्रो स्थान प्राप्त गरे । उनीहरुले पुरस्कारस्वरुप  क्रमशः पाँच, तीन र दुई हजार रुपैयाँ नगद पुरस्कार प्राप्त गरेको मूल्याङ्कन समितिका संयोजक तथा संघका पूर्व उपाध्यक्ष ईश्वर कर्माचार्यले जानकारी दिए ।
मेलाको दोस्रो दिन शुक्रबारबाट विद्यालयस्तरीय एकल र सामूहिक नृत्य प्रतियोगिता, लोकगीत प्रतियोगिता, लोपोन्मुख साँस्कृतिक कार्यक्रमका साथै विभिन्न मनोरञ्जनात्मक कार्यक्रमहरु आयोजना हुने आयोजक पोखरा उद्योग वाणिज्य संघका अध्यक्ष दामु अधिकारीले  जानकारी दिए । उनले उत्पादक र उपभोक्तालाई एउटै थलोमा भेट गराई उद्यमशीलता सृजना गर्न एक्सपो आयोजना गरिएको समेत दाबी गरे  ।  यसैगरी, पोखरा लगायत सम्पूर्ण राष्ट्रको औद्योगिक, कृषिजन्य, हस्तकलाका उत्पादन, सूचना प्रविधि, शिक्षा, स्वास्थ्य, पर्यटन लगायत कृषिजन्य उत्पादनहरुलाई प्रवद्र्धन तथा बजारीकरणमा सघाउ पु¥याउनु तथा गण्डकी प्रदेश र  पोखराको ब्यवसाय बिस्तारको संभावनाको खोजी एवं गण्डकी प्रदेशको पर्यटकीय सम्भावना उजागर गर्नु पनि एक्सपोको उदेश्य भएको आयोजक संस्था पोखरा उद्योग वाणिज्य संघका महासचिब अर्जुन पोखरेलले जानकारी दिए ।
एक्सपोमा पोखरा औद्योगिक क्षेत्रका उद्योगहरुका उत्पादन, मोवाइल र मोवाइलका सामानहरु, पर्यटन प्रवद्र्धनात्मक स्टल, मेड इन नेपाल पेभेलियन,  विभिन्न राष्ट्रिय तथा अन्तर्राष्ट्रिय उत्पादन, दैनिक उपभोग्य खाद्यबस्तु र लत्ताकपडा, पुष्प प्रदर्शनी,हस्तकलाका सामाग्री, अटो प्रदर्शनी, महिलाहरुका उत्पादनहरु, रेष्टुरेण्टहरुसहित ३ सय प्रदर्शनी कक्षहरु राखिएका छन् ।