रुपन्देही प्रहरीले शनिबार राती बुटवलमा ठूलो परिणाममा लागुऔषध चरेससहित तीन जनालाई पक्राउ गरेको छ ।

प्रहरीले शनिबार राती करीब ८ बजेको समयमा रुपन्देही जिल्लाको बुटवल उपमहानगरपालिका–१३ स्थित बेलबास शान्तिचोकबाट प्रदेश नं ५ तुलसीपुर दाङको प्रहरी अनुसन्धान टोलीले ३७ किलोग्राम चरेससहित तीन जनालाई पक्राउ गरेको हो । विशेष सुराकीका आधारमा इलाका प्रहरी कार्यालय बुटवलबाट खटिएको प्रहरी टोलीले ३७ किलोग्राम चरेससहित तीन जनालाई पक्राउ गरेको प्रदेश प्रहरी कार्यालयका प्रवक्ता प्रहरी नायब उपरीक्षक पुष्पराज मल्लले जारी गरेको विज्ञप्तिमा जनाइएको छ । पक्राउ परेका मध्ये एक स्थानीय तहका जनप्रतिनिधिसमेत रहेको र पक्राउ परेका सबैलाई थप अनुसन्धानका लागि इलाका प्रहरी कार्यालय बुटवलमा राखिएको इप्रका बुटवलका प्रहरी नायब उपरीक्षक डिलबहादुर मल्लले जानकारी दिनुभयो । पक्राउ हुनेमा बागलुङ जिल्ला नसीखोला गापा–९ बस्ने ३४ वर्षीय जनक घर्ती, कपिलवस्तु जिल्लाको बाणगङ्गा नगरपालिका–२ बस्ने ५० वर्षीय नहारी थारू र अर्घाखाँची पाणिनी गाउँपालिका–५ बस्ने ४० वर्षीय टीकाबहादुर रास्कोटी रहेका छन् । रास्कोटी सोही वडाका वडा सदस्य रहेको प्रहरीले जनाएको छ । उक्त परिणामको लागुऔषध चरेस बागलुङ जिल्लाबाट भारत निर्यात गर्नका लागि ल्याइएको र पक्राउ परेका सबै लागुऔषध कारोबारी हुनसक्ने प्रहरी नायब उपरीक्षक मल्लले बताउनुभयो । उक्त चरेस नेपाली मूल्यमा करीब रु १८ लाख बराबरको हुनसक्ने उहाँले बताउनुभयो ।

नेपाली काङ्गे्रसका उपसभापति विमलेन्द्र निधिले सर्लाहीका पार्टी कार्यकर्ता रामविलास महतोको हत्यारालाई केन्द्र र प्रदेश सरकारले संरक्षण दिइराखेको आरोप लगाउनुभएको छ । जनकपुर युथ क्लबको नवनिर्मित भवनको यहाँ आज उद्घाटन गर्दै उहाँले भन्नुभयो, “हत्याराको पहिचान भइसकेका अवस्थामा पनि पक्राउ गर्ने सन्दर्भमा केन्द्र र प्रदेश सरकार मौन बस्नु आपत्तिजनक हो ।” उपसभापति निधिले दुवै सरकार अपराधीलाई बचाउन उद्यत रहेको प्रसङ्ग उल्लेख गर्दै सर्लाही गोलीकाण्ड बारेमा प्रदेश सरकारको उदासिनताले मधेशवादी दलको मधेशी जनताप्रति गैरजिम्मेवार चरित्रलाई छरपस्ट पारेको बताउनुभयो । मधेशी दल कम्युनिष्ट सरकारको भ्रमरूपी जालमा फस्दै मधेशलाई नारामा सीमित राखेको चर्चा गर्दै उहाँले मधेशवादी दलले संविधान संशोधन पनि गराउन नसकेको तथा मधेशीको हितमा पनि कुनै कार्य गर्न र गराउन नसकेको धारणा व्यक्त गर्नुभयो । उपसभापति निधिले मधेशी दल मधेशको एजेण्डालाई समाप्त गर्नेतर्फउन्मुख रहेको उल्लेख गर्दै प्रदेश नंं २ को नामकरण मिथिला प्रदेश राख्नुपर्ने बताउनुभयो । मधेशवादी दल भ्रममा नपरी तथ्यपरक ढङ्गले मिथिला प्रदेश नामकरण गर्न अग्रसर हुनुपर्नेमा उहाँले जोड दिनुभयो । काङ्गे्रसका केन्द्रीय सदस्य महेन्द्र यादवले सङ्घीयतालाई सवल बनाउन सबै अग्रसर हुनुपर्छ भन्नुभयो । प्रदेशसभा सदस्य रामसरोज यादवले प्रदेश नं २ मा ४५ प्रतिशत मैथिली भाषाभाषी भएका कारण प्रदेशको कामकाजको भाषा मैथिली हुनुपर्ने धारणा राख्नुभयो । अर्का प्रदेशसभा सदस्य परमेश्वर साहले युवालाई कुलतबाट बचाउन सबै पक्षको क्रियाशीलतामाथि जोड दिनुभयो । प्रदेशसभा सदस्य मीनाक्षी झा र जनकपुरधाम उपमहानगरपालिकाका उपप्रमुख रीता मिश्रले लागुऔषध र आपराधिक कार्यतर्फ उद्यत युवाको मनोविज्ञानमा परिवर्तन हुने अभियान चलाउनुपर्छ भन्नुभयो ।