कास्की । कास्की—२ को चुनाव हाँक्न नेपाली कांग्रेसका नेता डा. मिनेन्द्र रिजाल यतिबेला पोखरामा छन् ।
कास्की–२ को उपनिर्वाचनमा पार्टीको चुनावी कमाण्डर बनेर पोखरामा खटिएका नेता रिजालले जनतामा छाएको निराशालाई उत्साहमा परिणत गर्न कांग्रेसले निर्वाचन जित्नै पर्ने बताए ।उनले कम्युनिष्ट शासनले मुलुकलाई उल्टो बाटोमा लगेको आरोप लगाएका छन् । मुलुकमा जसरी भ्रष्टाचार बढेको छ, जसरी विकास निर्माणका काम अवरुद्ध छन्, मुलुकको हित विपरितको गतिविधि भएका छन् त्यसलाई रोक्न कास्की–२ का जनताले काँग्रेसलाई जिताउनु पर्ने उनको भनाइ थियो ।
चुनाव प्रचार कार्यक्रम अन्तर्गत मंगलबार पोखरा–१७ मा घरदैलो अभियानमा सहभागी नेता रिजालले त्यागी नेता खेमराज पौडेललाई चुनाव जिताएर देशैभर सन्देश दिन आवश्यक रहेको भन्दै जनताले पनि कम्युनिष्टलाई मन पराउन छाडेको दावी गरे ।
घरदैलो अभियानमा कांग्रेस नेता डा. रिजाल, उम्मेदवार खेमराज पौडेल, कास्की कांग्रेसका सभापति एवं चुनाव प्रचारप्रसार मुल समितिका संयोजक कृष्ण केसीसहित नगरसभापति वजीरमान श्रेष्ठ, नेता देवराज चालिसे, वडा सभापति देवराज आचार्य, काँग्रेस कास्कीका जिल्ला सदस्य नम्रता बराल लगायत नेता तथा कार्यकर्ताहरुको उलेख्य सहभागीता रहेको छ ।