चौथो संस्करणको साफ यू–१५ च्याम्पियनसिप फुटबल प्रतियोगिताको उपाधि बङ्गलादेशले जितेको छ ।

शिक्षा, विज्ञान तथा प्रविधि मन्त्रालयले शिक्षक, कर्मचारी र विश्वविद्यालयका प्राध्यापकलाई सामाजिक सञ्जाल र मोबाइल फोन प्रयोगमा अंकुश लगाएको छ  । मन्त्रीस्तरीय निर्णयबाट स्वीकृत ‘सामाजिक सञ्जाल र मोबाइल फोन सञ्चालन तथा प्रयोगसम्बन्धी मार्गनिर्देशन २०७५’ मार्फत मन्त्रालयले फेसबुक, ट्वीटर, इमो, भाइबरजस्ता सामाजिक सञ्जाल आफूखुसी प्रयोग गर्न रोक लगाएको हो । कात्तिक १३ गते स्वीकृत ६ बुँदे मार्गनिर्देशन तत्काल लागू हुने भनिएको छ, जसमा कार्यालयको खर्चमा भ्रमण गर्ने व्यक्तिले व्यक्तिगत रूपमा खिचिएको धार्मिक स्थल, बाटो, तालतलैया वा भ्रमण गरिएका स्थानको तस्बिरसमेत सामाजिक सञ्जालमा राख्न नपाइने उल्लेख छ । त्यस्तै, कुनै कार्यक्रम सञ्चालन भइरहेको अवस्थामा सहभागीले मोबाइल फोन प्रयोग गरी अनावश्यक फोटो खिच्न नपाइने भनिएको छ । शिक्षक, कर्मचारीको सामाजिक सञ्जाल प्रयोग र अनुगमनको जिम्मेवारी सम्बन्धित कार्यालय प्रमुखलाई दिइएको छ । शिक्षकलाई कक्षाकोठामा पढाइमा असर पुग्ने गरी मोबाइल फोन प्रयोग नगर्न भनिएको छ । मार्गनिर्देशनमा उल्लेख भएविपरीत कार्य गर्ने शिक्षक–कर्मचारीलाई कारबाही गर्न मन्त्रालयले सम्बन्धित निकायलाई सिफारिस गर्ने शिक्षा सचिव बरालले बताए । कुनै कारणवश खिचेमा स्वीकृति नलिई सामाजिक सञ्जालमा राख्न, टिप्पणी गर्न र लाइक गर्नसमेत रोक लगाइएको छ । क्यामेराले फोटो खिच्न पाइने वा नपाइने विषयमा भने मार्गनिर्देशन मौन छ । बिनाअनुमति अपलोड, टिप्पणी, लाइक र सेयर गरे प्रतिलिपि अधिकार र व्यक्तिगत गोपनीयताको हकविरुद्ध कार्य गरेको भनी आवश्यक कारबाही अघि बढाउने मन्त्रालयले चेतावनी समेत  दिएको छ ।

पोखरामा जारी सर्वाधिक पुरस्कार राशीको नमस्ते पोखरा प्रिमियर लिग (पीपीएल) टी–ट्वान्टी क्रिकेटको दोस्रो चरणमा पुग्ने टोलीको टुङ्गो लागेको छ । शनिबार लिग चरणको अन्तिम दुई खेल सकिएसंगै पीपीएलको दोस्रो चरण पुग्ने तीन टोलीको तय भएको हो । शनिबार भएको पहिलो खेलमा पोखरा पल्टनले हुलास काठमाडौं रोयल्सलाई ४ विकेटले हराएको थियो । यस्तै अन्तिम खेलमा चितवन राइनोजले विराटनगर टाईटन्सलाई ४ विकेटले नै हराएको थियो । जितसंगै शरद भेषवाकरको पोखरा शीर्ष स्थानमा रहेर फाइनल पुगेको छ ।  पारस खड्काको चितवन दोस्रो र ज्ञानेन्द्र मल्लको काठमाडौंले तेस्रो स्थानमा रहेर एलिमिनेटर (प्लेअफ) मा स्थान बनाएका छन्  । दिपेन्द्र सिंह ऐरीको एक्स्पर्ट धनगढी ब्लुज, सोमपाल कामीको बुटवल ब्लास्टर्स र सन्दीप लामिछानेको विराटनगर भने प्रतियोगिताको पहिलो चरणबाट बाहिरिएको छ  । पीपीएलमा शीर्ष टोलीले सिधै फाइनल खेल्ने र तेस्रो तथा चौथो टोलीले फाइनल प्रवेशका लागि प्ले अफ खेल्नुपर्ने नियम रहेको थियो । यस्तो अवस्थामा अन्तिम दिनसम्म फाइनल र प्ले अफ पुग्ने टोलीको टुङ्गो लागेको थिएन । फाइनल र प्ले अफ समीकरण अन्तिम दिनसम्म रोमान्चक मोडमा पुगेको थियो ।अन्तिम दिनको दुई खेल बाँकी रहदा सहभागि ६ वटै टोलीको फाइनल र प्ले अफ पुग्ने सम्भावना रहेको थियो । शनिबारको खेलपछि पोखराले ५ खेलबाट ३ जित र दुई हार व्यहोर्दै ६ अंक जोड्यो । र, पोखराले नेट रन रेटको आधारमा शीर्ष स्थान हात पार्यो । शीर्ष स्थान हात पारेसंगै प्रतियोगिता नियम अनुसार मंगलबार हुने फाइनलमा स्थान पक्का गर्यो । यस्तै विराटनगरलाई हराएसंगै चितवनले ५ खेलबाट ३ जित र दुई हारसंगै ६ अंक नै जोड्यो । तर, चितवन नेट रन रेटमा पोखरा भन्दा पछि रह्यो । जसको कारण चितवनले प्ले अफ खेल्नु पर्यो । अब चितवनले आइतबार प्ले अफमा काठमाडौंसंग खेल्नेछ । अन्तिम खेलमा पराजित भएपनि काठमाडौंले ५ खेलबाट ६ अंक नै जोड्यो । र, एक्स्पर्ट धनगढीभन्दा नेट रन रेटमा माथि रहदै काठमाडौंले प्ले अफमा स्थान बनाउन सफल भयो । यता, ५ खेलबाट ६ अंक जोडेर पनि चौथो स्थानमा रहदै धनगढी प्रतियोगिताबाट बाहिरियो । यस्तै सुरुवातमा लगातार दुई जित निकालेको बुटवलले ५ खेलबाट ४ अंक जोड्दा प्लेअफ यात्रा तय गर्न सकेनन्  । सुरुवातबाटै खराब लयमा देखिएको विराटनगर ५ खेलबाट २ अंक जोडेर अन्तिममा रहदै प्रतियोगिता सकाएको छ ।