विश्वबाट कम्युनिस्ट सरकार हराएर जाने , प्रमुख सचेतक खांड
मुकेश यादव बारा,
२५ असोज नेपाली कांग्रेसका प्रमुख सचेतक बालकृष्ण खांडले विश्वबाट नै कम्युनिस्ट सरकार विलय भएर जाने बताएका छन । नेपाली कांग्रेस नगर कार्य समितिले जितपुर सिमरा उपमहानगरपालिकाको मध्यमाञ्चल स्वास्थ्य तालिम केन्द्र पथलैयामा आयोजना गरेको खुल्ला रक्तदान तथा शुभकामना आदानप्रदान कार्यक्रमलाई सम्बोधन गर्दै सचेतक खांडले यस्तो बताएका हुन । वहाँले आउदो १० वर्ष भित्रमा विश्वभरीका कुनै पनि मुलुकमा कम्युनिस्ट सरकारमा नरहने ठोकुवा गरे । जब १० वर्ष भित्र मा विश्वबाट नै सरकारबाट हराएर जान्छ भने नेपालको त कुरा नै गर्नु पर्दैन प्रमुख सचेतक खांडले ओली नेतृत्वको सरकारले बोलीमा मात्र सिमित रहेको छ । निर्मला पन्तको दोषीलाई पक्राउ गरि कारवाही गर्न नसकी दिन प्रति दिन मुलुकमा हत्या, हिंसा, बलात्कारको घटनामा वृद्धि भएपनि ओली नेतृत्वको सरकारले दोषीलाई बचावको पक्षमा लागेको संज्ञा दिएका थिए । ओलीको बोलीको भरमा सरकार नचल्ने ठोकुवा गर्दै प्रमुख सचेतक खांडले सरकारले जनतामाथि लादेको करले जनताहरू असन्तुष्ट छन, जनता असन्तुष्ट भएपछि सरकार चल्दैन । संविधानको रक्षा गर्नको लागि, लोकतन्त्रको रक्षा, मुलुकमा शान्ति, स्मृद्धि र विकासको लागि नेपाली कांग्रेसले आन्दोलन गर्ने बताए । अहिले सबैले मिलेर पार्टीलाई मजबुत बनाउनु पर्ने दिन आएको प्रमुख सचेतक खांडले बताए । कार्यक्रमलाई सम्बोधन गर्दै नेपाली कांग्रेसका केन्द्रीय सदस्य महेन्द्र यादवले यो सरकार पांच वर्ष सम्म रहनुको त कुरै छोडौ सरकारको रवैयाले गर्दा साढे दुई वर्ष सम्म नटिकने ठोकुवा गरे । कार्यक्रममा पर्साका सभापति अजय द्विवेदी, प्रदेश सभा सदस्य शोभा लामा, पुर्व सांसद मधुशाही ठकुरी, नेपाल तरूण दल बाराका अध्यक्ष लुकेश सिंह, ट्रेड युनियनका विश्वमणी शर्मा लगायतकाले शुभकामना मन्तब्य व्यक्त गरेका थिए । नगर सभापति श्यामबाबु गुप्ताको अध्यक्षतामा सम्पन्न कार्यक्रममा स्वागत मन्तब्य सुशील ढोडारीले गरेका थिए भने सञ्चालन कालिका ढकालको रहेको थियो ।
प्रदेश नम्बर ३ सरकारका काम मन्द गतिमा,अपेक्षाअनुसारको काम गर्न नसकेको नागरिकको गुनासो
हेटौंडा ।३ नम्बर प्रदेशमा सरकार गठन भएको ८ महिना पुग्न थालिसक्यो तर प्रदेश सरकारको काम भने मन्द देखिएको छ ।जनताका अपेक्षा अनुसार प्रदेश सरकारले काम गर्न नसकेको भन्दै नागरिकले गुनासो गर्न थालेका छन । प्रतिपक्ष ले मात्र होइन ७र८ महिनासम्म सरकारले झिना मसिना कार्यक्रम र सभा समारोहमै आफूलाई केन्द्रित गरेको प्रति नागरिक निराश छन । आगामी दिनमा प्रदेशसरकारले जन अपेक्षा बमोजिम काम गर्ने जनताले सुझाव दिएका छन ।
केन्द्रीय राजधानीसमेत रहेको यो प्रदेशलाई जनताले अलि बढी अपेक्षाका साथ हेरिरहे पनि सरकार भने कानुन निर्माणमै अल्झेको देखिन्छ ।
त्यस्तै विकास निर्माणका काममा पनि उल्लेख्य उपलब्धि हासिल गर्न सकेको छैन । जसले सरकार आलोचित हुन थालेको छ ।
अर्कोतिर १ सय ९९ ओटा कानुन प्रदेशले निर्माण गर्नुपर्ने भएपनि अहिलेसम्म १८ ओटा कानुन मात्रै निर्माण गरिएका छन् ।
स्थायी राजधानी नामाकरणको विषय पनि अझै अनिर्णित नै छ । अर्कोतिर प्रतिपक्षीले पनि सरकारको गतिविधिलाई प्रति असन्तुष्ट छ ।
दुईतिहाइको सरकारबाट जनताले ठूलो आशा गरेको भएपनि यो सरकारले केही गर्न नसकेको नेपाली काँग्रेसका केन्द्रिय सदस्य डिना उपाध्याय बताउछिन ।
यद्यपि प्रदेश सरकारको गौरवको योजना हेटौंडाबाट काठमाडौं जोड्ने पोष्टबहादुर बोगटी सुरुङमार्गको निर्माणको गृहकार्य भने आफैले थालेको छ ।
कानुनको अभावका कारण सोँचेजति काम गर्न नसकिएको प्रदेश प्रमुख डोरमणि पौडेल स्वीकार्छन । सरकारले हिड्ने बाटो पहिल्याएको छ ,अब बाटो फराकिलो पार्दै त्यसमा कुँद्ने काम मात्र बाँकी छ मुख्यमन्त्री पौडेल ले भने
प्रतिपक्षले आलोचना गर्ने ठाउँ नपाएर आलोचनाका लागि आलोचना गरिरहेकोले त्यसको कुनै अर्थ छैन ।
सुकीको विरोध गरेको आरोपमा तीन पत्रकार पक्राउ
याङ्गुन, म्यानमारको प्रहरीले बुधबार तीन जना पत्रकारलाई पक्राउ गरेको छ ।
म्यानमारकी शीर्ष नेत्री आङ साङ सुकीको संरक्षकत्वमा रहेको सरकारको आर्थिक व्यवस्थापनका बारेमा पत्रिकामार्फत आलोचना गरेपछि उनीहरूलाई पक्राउ गरिएको हो ।
म्यानमारमा भएको यस घटनालाई प्रेस स्वतन्त्रता विपरित भएको भन्दै देशभित्र र बाहिर व्यापक विरोध भएको समाचारमा जनाइएको छ ।
अधिकारवादीहरूले पक्राउ गरिएकालाई तत्काल विना शर्त रिहा गर्नुपर्ने माग गर्दै सरकार र सरोकारवालाहरूलाई दबाब दिएका छन् ।
पक्राउ पर्नेमा इलेभन मिडिया ग्रुपका पत्रकारहरू रहेका छन् । उनीहरूले शृङ्खलाबद्ध रूपमा सरकारका कमीकमजोरी र पत्रकारिता क्षेत्रमाथि भएका हस्तक्षेपको विपक्षमा लेख्दै आएका थिए ।
इलेभन मिडियाका कार्यकारी सम्पादकद्वय क्याब जाब लिन र नायी मिन र प्रमुख समाचारदाता फ्यो वाई बिनलाई प्रहरीले पक्राउ गरेको हो ।
यही सोमबार प्रकाशित एउटा लेखका आधारमा प्रहरीले उनीहरूलाई पक्राउ गरेको पक्राउ परेका पत्रकारहरूको पक्षका वकिल क्यी मयीन्टले एएफपीलाई जानकारी दिनुभयो ।
यसअघि म्यानमारको एक अदालतले दुई पत्रकारलाई सात वर्षको जेल सजाय तोकेको थियो । राज्यको कानून उलङ्घन गरेको भन्दै उनीहरूलाई सजायको आदेश दिएको थियो ।
अदालतले सजाय दिएका ती पत्रकारहरूले रोहिङ्ग्या शर्णार्थीबारे रिपोर्टिङ गर्दै आएका थिए । उनीहरूले रोहिङ्ग्याहरूको सामूहिक हत्याबारे अनुसन्धानमूलक समाचार प्रकाशन गरेका थिए ।
नोबेल शान्ति पुरस्कार विजेता म्यानमारकी नेत्री सुकीको समर्थनमा भएका पछिल्ला गतिविधिले विश्वभरी नै उहाँका आलोचक बढ्दै गएका छन् ।
–––
पोखराको फेवातालमा पौडी प्रतियोगिता हुने
कास्की, पोखराको फेवातालमा पौडी प्रतियोगिता हुने भएको छ । नेपाल पौडी सङ्घ र कास्की जिल्ला पौडी सङ्घको आयोजनामा असोज २६ गते फेवातालको दुई दशमलब पाँच किमी दूरीमा आठौँ खुल्ला पौडी प्रतियोगिता गरिने पत्रकार सम्मेलनमा जानकारी दिइयो ।
पौडी खेलको विकास र विस्तार गरी खेल पर्यटनको विकासका लागि उक्त प्रतियोगिता आयोजना गर्न लागिएको नेपाल पौडी सङ्घका महासचिव जगतमान श्रेष्ठले जानकारी दिनुभयो । श्रेष्ठका अनुसार प्रतियोगितामा विदेशी पर्यटकसहित लगभग ५० जना सहभागी हुनेछन् । पुरुष र महिलाको छुट्टाछुट्टै मूल्याङ्कन गरिने र फेवातालको बाराहीघाटबाट पारी पुगेर पौडीबाजहरु पुनः बाराहीघाटमै फर्कने रुट तय गरिएको छ ।