दलित महिला सङ्घ (फेडो) कास्कीको आयोजनामा तथा सङ्कल्प गण्डकी प्रदेशको समन्वयमा सञ्चालित कानुनी प्रशिक्षण तथा अन्तरक्रिया कार्यक्रम बुधबार पोखरामा सम्पन्न भएको छ।
फेडोद्वारा सञ्चालित कार्यक्रममा दलित समुदायका सक्रिय महिला अगुवाहरूलाई जातीय विभेद तथा हिंसाका सम्बन्धमा संविधान र कानुनी जानकारी दिइएको थियो।
प्रशिक्षणको सहजकर्ता सङ्कल्प गण्डकी प्रदेशकी संयोजक तथा अधिवक्ता सरिता तिम्सिना पंगेनीले जातीय विभेद अन्त्यका लागि सङ्घ, प्रदेश र स्थानीय सरकार तीनवटै तहले प्रभावकारी संयन्त्र निर्माण गरी संविधान र कानुनको कार्यान्वयन गर्नुपर्नेमा जोड दिनुभयो।
उहाँले विभेद अन्त्यका लागि स्पष्ट नीति, योजना र बजेटमा उच्च प्राथमिकता दिनुपर्ने आवश्यकता औँल्याउनुभयो।
प्रशिक्षणमा सहभागी सुशीला बिक, ममता गुरूङ बिक र इश्वरी नेपालीले सिकेका ज्ञान र सीप समुदायस्तरसम्म लैजाने प्रतिबद्धता जनाउँदै यस्ता कार्यक्रमले आफूहरूको क्षमता अभिवृद्धिमा उल्लेखनीय टेवा पुर्याएको धारणा राखे।
दलित महिला सङ्घकी अध्यक्ष लक्ष्मी परियारको अध्यक्षतामा सम्पन्न कार्यक्रमको सञ्चालन कार्यक्रम संयोजक इश्वरी बिकले गर्नुभएको थियो। कार्यक्रममा फेडोका २० जना महिला अगुवा कार्यकर्ताहरूको सक्रिय सहभागिता रहेको थियो।
समाचार
LATEST ARTICLES
कास्कीको काँहुखाेला सिक्लेस सडकमा राति सवारी सञ्चालनमा राेक
कास्की । आजदेखि कास्कीकाे काँहुखाेला सिक्लेस सडकमा रातिको समयमा सवारी साधन संचालनमा राेक लगाईएकाे छ।
मंगलबार कास्कीका प्रमुख जिल्ला अधिकारी रुद्रादेवी शर्माकाे अध्यक्षतामा बसेकाे जिल्ला सुरक्षा समिति कास्कीको बैठकले साे निर्णय गरेकाे कास्कीका सहायक प्रमुख जिल्ला अधिकारी शिव लम्सालले जानकारी दिनुभयाे।
निर्णय अनुसार गाडी चलाउन रोकिएको अवधिसम्म अत्यावश्यकबाहेकका सबै गाडीलाई रोकिनेछ ।
यस वर्षको मनसुन सक्रिय अवस्थामा रहेकोले वर्षातको समयमा सुरक्षा संयमता अपनाउन र बाढी, पहिरोको कारणबाट यात्रु तथा सवारी साधनहरुमा हुनसक्ने सम्भाव्य क्षति न्यूनीकरणका लागि सतर्कता अपनाउन बुधबार देखि लागू हुने गरी ७ दिनकाे लागि काँहुखोला देखि सिक्लेस जाने सवारी साधनहरु साँझ ५ बजेभित्र प्रस्थानविन्दुबाट गन्तव्यस्थलको लागि छुटिसक्नुपर्ने र सिक्लेस देखि काँहुखोला जाने सवारी साधनहरु बिहान ५:०० बजेपछि प्रस्थानविन्दुबाट गन्तव्यस्थलको लागि छुट्न पाउने व्यवस्था गरिएकाे कास्कीका प्रमुख जिल्ला अधिकारी रुद्रादेवी शर्माले पाेखरा पाेष्टलाई जानकारी दिनुभयो ।
विरेठाँटी देखि घान्द्रुक, विरेठाँटी देखि उल्लेरी र लुम्ले देखि लान्द्रुक जाने सवारी साधनहरु साँझ ५:०० बजेभित्र प्रस्थानविन्दुबाट गन्तव्यस्थलको लागि छुटिसक्नुपर्ने र घान्द्रुक देखि विरेठाँटी, उल्लेरी देखि विरेठाँटी र लान्द्रुक देखि लुम्ले जाने सवारी साधनहरु बिहान ५:०० बजेपछि प्रस्थानविन्दुबाट गन्तव्यस्थलको लागि छुट्न पाउने यस अघि नै गरिएकाे व्यवस्थालाइ निरन्तरता दिइएकाे जिल्ला प्रशासन कार्यलय कास्कीले मंगलबार जारी गरेकाे सुचनामा जनाइएकाे छ ।
कास्कीका विरेठाँटी घान्द्रुक ,लुम्ले लान्द्रुक,काँहुखाेला ताङतिङ सडकमा राति सवारी सञ्चालनमा राेक
कास्की ।कास्कीका विरेठाटी घान्द्रुक,लुम्ले लान्द्रुक र काँहुखाेला ताङ्तिङ सडकमा रातिको समयमा सवारी साधन संचालनमा राेक लगाईएकाे छ।
साेमबार कास्कीका प्रमुख जिल्ला अधिकारी रुद्रादेवी शर्माकाे अध्यक्षतामा जिल्ला समन्वय समिति प्रमुख, स्थानीय तहका प्रमुख तथा पदाधिकारीहरु, सुरक्षा निकायका प्रमुखहरु, यातायात व्यवसायीहरु लगायतका सरोकारवाला निकाय/संस्थाका पदाधिकारी तथा प्रतिनिधिहरुको उपस्थितिमा बसेको वैठकबाट साे निर्णय भएकाे कास्कीका सहायक प्रमुख जिल्ला अधिकारी शिव लम्सालले जानकारी दिनुभयाे।
निर्णय अनुसार गाडी चलाउन रोकिएको अवधिसम्म अत्यावश्यकबाहेकका सबै गाडीलाई रोकिनेछ ।
यस वर्षको मनसुन सक्रिय अवस्थामा रहेकोले वर्षातको समयमा सुरक्षा संयमता अपनाउन र बाढी, पहिरोको कारणबाट यात्रु तथा सवारी साधनहरुमा हुनसक्ने सम्भाव्य क्षति न्यूनीकरणका लागि सतर्कता अपनाउन बुधबार देखि लागू हुने गरी १५ दिनको लागि विरेठाँटी देखि घान्द्रुक, विरेठाँटी देखि उल्लेरी र लुम्ले देखि लान्द्रुक जाने सवारी साधनहरु साँझ ५:०० बजेभित्र प्रस्थानविन्दुबाट गन्तव्यस्थलको लागि छुटिसक्नुपर्ने र घान्द्रुक देखि विरेठाँटी, उल्लेरी देखि विरेठाँटी र लान्द्रुक देखि लुम्ले जाने सवारी साधनहरु बिहान ५:०० बजेपछि प्रस्थानविन्दुबाट गन्तव्यस्थलको लागि छुट्न पाउने व्यवस्था गरिएकाे छ ।
त्यसैगरी काँहुखोला देखि ताङ्तिङ जाने सवारी साधनहरु साँझ ४:३० बजेभित्र प्रस्थानविन्दुबाट गन्तव्यस्थलको लागि छुटिसक्नुपर्ने र ताङ्तिङ देखि काँहुखोला जाने सवारी साधनहरु बिहान ५:०० बजेपछि प्रस्थानविन्दुबाट गन्तव्यस्थलको लागि छुट्न पाउने व्यवस्था गरिएकाे कास्कीका प्रमुख जिल्ला अधिकारी रुद्रादेवी शर्माले पाेखरा पाेष्टलाई जानकारी दिनुभयो ।
प्रधानमन्त्रीसँग गण्डकीसहित पाँच प्रदेश प्रमुखहरूको भेटवार्ता
काठमाण्डौ ।गण्डकी प्रदेश प्रमु ख डिल्लीराज भट्टसहित पाँच प्रदेश प्रमुखहरुले प्रधानमन्त्री केपी शर्मा ओलीसँग भेटवार्ता गर्नुभएको छ । काठमाण्डौमा उपलब्ध पाँच प्रदेश प्रमुखहरुले प्रधानमन्त्रीको सरकारी निवास बालुवाटारमा सोमबार राति प्रधानमन्त्री ओलीसँग भेट गर्नुभएको हो ।
भेटमा संघीयताको कार्यान्वयन, प्रदेश सरकारको कामकारबाही तथा संघ र प्रदेश सरकारको समन्वयका विषयमा छलफल भएको थियो । उहाँहरूबीच आ–आफ्नो प्रदेशको अवस्थाका बारेमा छलफल भएको प्रधानमन्त्री कार्यालयले जनाएको छ ।
प्रधानमन्त्री ओलीसँग भेट गर्न पाँच प्रदेशका प्रदेश प्रमुखहरू सोमबार अबेर बालुवाटार पुग्नुभएको थियो । गण्डकी प्रदेश प्रमुख डिल्लीराज भट्ट, कोशी प्रदेश प्रमुख परशुराम खापुङ, मधेश प्रदेश प्रमुख सुमित्रा सुवेदी भण्डारी, बागमती प्रदेश प्रमुख दीपकप्रसाद देवकोटा र सुदूरपश्चिम प्रदेश प्रमुख नजिर मियाँ भेटमा सहभागी हुनुहुन्थ्यो । कोशी र कर्णालीका प्रदेश प्रमुख असार १८ गते राष्ट्रपतिसँग भेटपछि काम विशेषले आफ्नो प्रदेश फिर्ता भएकाले उपस्थित हुन सक्नुभएन ।
प्रदेश प्रमुख प्रदेशको प्रमुखमात्र नभई केन्द्रको प्रतिनिधि पनि भएकाले संघ र प्रदेशबीचको समन्वयकर्ता रहेको प्रधानमन्त्री ओलीले बताउनुभयो । प्रधानमन्त्री ओलीले पछिल्लो समय संघीयता र त्यसमाथि पनि प्रदेश संरचनाको आलोचना भएको उल्लेख गर्दै संघीयतालाई बलियो र प्रभावकारी बनाउनुपर्ने बताउनुभयो ।
सामूहिक भेटवार्तामा प्रदेश प्रमुखहरूले राष्ट्रपति रामचन्द्र पौडेलको निमन्त्रणामा सात वटै प्रदेशका प्रमुखहरु शितल निवास पुगी भेटवार्ता र छलफल गरेको जानकारी गराउनुभयो । प्रदेश प्रमुखहरूले आफ्नो कार्यक्षेत्रका सामाजिक, राजनीतिक तथा आर्थिक अवस्थाबारे साझा अवधारणा बनाई प्रधानमन्त्री समक्ष प्रतिवेदन हस्तान्तरण गर्नुभएको थियो ।
प्रदेश प्रमुखहरूले आफूले भोग्नुपरेका कठिनाइ, कानुन तथा नियममा रहेका अन्यौलहरूको बारेमा जानकारी गराउँदै यसको समाधानका लागि प्रधानमन्त्रीसमक्ष अनुरोध गर्नुभयो ।
गण्डकी प्रदेशका प्रमुख डिल्लीराज भट्टले प्रधानमन्त्रीसँगको भेटमा मुख्यतः संघीयताको प्रभावकारी कार्यान्वयनको विषयमा छलफल भएको जानकारी दिनुभयो । उक्त अवसरमा प्रदेश प्रमुखहरूले प्रधानमन्त्रीसँग नियमित सम्पर्क र समन्वयका लागि आग्रह पनि गर्नुभएको थियो ।
प्रधानमन्त्री ओलीले संघीयताको प्रभावकारी कार्यान्वयन, यसमा देखिएका समस्या र समाधानका उपायबारे सबै प्रदेश प्रमुख र मुख्यमन्त्रीहरूलाई बोलाएर छलफल गर्ने बताउनुभएको छ ।
उक्त अवसरमा गण्डकी प्रदेश प्रमुख डिल्लीराज भट्ट र सुदूरपश्चिम प्रदेश प्रमुख नजिर मियाँले आफ्ना प्रदेश कार्यालयबाट प्रकाशित बुलेटिन प्रधानमन्त्रीलाई हस्तान्तरण गर्नुभएको थियो ।
